هابي فالنتين داي

إنهارده الفالنتين داي، عيد الحب، هو أنا مقتنع إن الحب لازم يبقى كل يوم، بس برضه حلو إنّه يكون له عيد، الحب نفسه كمعنى هو أنقى حاجة ربنا خلقها، لو جيتي فكرتي حتلاقي إننا من غيره ولا حاجة، حنبقى مجرد ناس بتاكل وتشرب وتنام، لكن حتى الأكل والشرب والنوم ممكن لو بقى غالب عليهم الحب، الحياة حيكون لها طعم، لو رحنا مطعم جديد سوا، أو لو حتى كلنا عيش بالسجق في قهوة فاروق، الأكل بتحسيه بينزل مختلف، وممكن تاكلي كتير من غير تحسي، عشان بتكون المشاعر هي اللي غالبة مش الجوع.

أنا في الأيام اللي بكون فيها مرهق أو مخنوق، بحس إن النوم ممكن يبقى علاج، بس في حالة واحدة، لو كنتي إنتي جنبي على السرير تنشري الدفء، وتخلي أي دوشة تبقى ساكنة.

...

أول ما الناس بتتكلم عن عيد الحب، بفتكر يوم ما قلت لك "تتجوزيني؟".. اللحظة دي الأهم في حياتنا على الإطلاق، دا اليوم اللي قررنا فيه نرتبط للأبد، سبق اليوم محاولات وشك وقلق وترقب، بحس إن دي أكتر لحظة أنا كنت بحبّك فيها، أو بمعنى أدق أكتر لحظة حسيّت فيها بحبّك، وحسيت إنّي لو مقلتش لك تتجوزيني، إنّي ممكن أبعد، وأنا فعلاً أدركت إن البعد عنك عامل زي حد قرر إنه يكتئب بمزاجه. بعدها قلت لك بحبّك، أجمل كلمة ممكن تتقال، وأهم لحظة ممكن تتعاش. صباحات الحب مختلفة، بتصنع مزاج رائق، وتخلّي الصعب أسهل.

...

المشاركة، أهم حاجة في الحب، إن الاتنين يشتركوا في كل تفصيلة ما بينهم، حتى لو تفاصيل تتضايق، حتى لو هواجس ممكن تبقى مؤلمة، بس في وسط الغم اللي بنعيشه، مفيش حضن أوسع من حضن اللي بنحبّه، ومفيش حيطة نتسند عليها غير حيطة الحب.

...

عيد الحب السنة دي بقضيه وأنا باكل سمبوسك بالبسطرمة من عمايل إيدك الحلوين. بالمناسبة أنا بحب كل حاجة إنتِ بتعمليها بإيدك، مجرّد وقفتك عشان تطبخي حاجة وتفضلي في شغف عشان تعرفي عجبتني ولا لأ، بتخلّيني يعني أحب اللي بتعمليه، أنا وقعت في غرام البسكوت بالينسون والمكرونة بالريحان والمقلوبة بالفراخ. حسيّت في أكلك كلام ناس زمان: النفس، إنتِ نفسك في كل حاجة مش بس في الأكل، تعرفي إن من أجمل الحاجات فيكِ إنّي بحس في تلمّسك للأشياء بريحة زمان اللي معشتهاش بس كلنا اتولدنا مبهورين بيها، حبّك للأغاني القديمة، اهتمامك بالذكريات، ولعك بالعمارات القديمة، رغبتك في الهدوء ورتم الحياة البطيء، إنتِ باختصار هبة الله ليّا فعلاً.

...

حنحتفل إن شاء الله بعيد الحب السنة دي، بس مش حنعمل زي الناس (تخيلي لو رحنا كل أماكنا المفضلة إنهارده ولقيناها مليانة وفيها ناس ملزقة). والسنة الجاية نحتفل وإحنا في بيتنا وأجيب لك تورتة حمرا، وآكلها لوحدي.

...

هابي فالنتين داي.. وكل سنة وإنتِ حبيبتي، وكل أيامنا حب.

تدوينة سريعة قبل ما انام

من اول ما شفت فيلم "before midnight" و انا مازال عندي حالة صدمة نوعا ما ،
يا ترى دة شكل كل قصص الحب ؟ ،حتى الخيالية الحالمة منها ؟
طب بالنسبة لقصص الحب اللي في مجتمعات معفنة مجنونة ؟ 
بعترف ان الفيلم واجهني بكل هواجسي القديمة و العادية ،كل الحوار و كل الكلام مطبوع في دماغي لحد دلوقتي و مش عارفة ارميه ورا ضهري .
انا اتصدمت لما اتكشفت ان انا البطلة ،بكل دماغي و تفكيري و قلقي ،اتصدمت اني ممكن اوصل احيانا للجنان دة .و بقيت عمالة اجيب المواقف و احطها عالواقع ،لما انهاردة قلت على موضوع السمبوسك دة افتكرت لما كانت بتقول ان الاكل د بيطبخه الجنيات .
الصدمة دايما بتبقى في الحاجات اللي بتتحول للعادي و مبقتش تبهرنا ،كمان في الحاجات اللي بتتحول لواجب ،في الحاجات اللي بنبطل نعملها .
اختصاراُ انا في حالة عاطفية سيئة و غطسانة و مش عارفة اخرج منها .
نفسي في شكر دايم و تقدير مش بيخلص على اي حاجة حتى لو نمطية او عادية ،ممكن اكون بمر بأزمة عمرية بتيجي للي بيعدوا 25 و هما معملوش حاجة تذكر .عندي حالة يأس بتاكل كل اللي حواليها ،نفسي في كرتين متفجرتين زي اللي في كاندي كراش لما بيخبطول ببعض بيمسحوا كل حاجة ،نفسي فيهم جوا دماغي عشان يخفوا كل حاجة مقرفة و يقضوا عاليأس دة كله .
.......
أكتر لحظة بتلح عليا اليومين دول و بتعتبر لحظة تيت فعلا لما بفتكرها .
كان في يوم و انا في عمان اتمشيت في البلد لوحدي و بعدين قعدت ادور على مكان آكل فيه ،طبعا دة كان شيء سيء لان الاكل مكانش كويس في كل حتة هناك .
لفيت و لقيت محل متواضع ،طبعا و لاني كنت لوحدي فقبل ما اختار مكان اكل فيه لازم اسال عن الاسعار لانه لو الفلوس اللي معايا خلصت فأنا مفيش حد استلف منه و هحتاس .
المهم قعدت جوة المحل و طلبت معجنات بالسوسيس و سندوتش شاورمة صغير و وواحداية كبيبة ،الاكل مكانش كويس طبعا ،قعدت في كرسي مواجه للباب اتفرج عالناس ،الشيف بتاع الشاورما كان مصري و كان ذوق معايا لاني مصرية .
انا لسة فاكرة طعم الأكل دة كويس و اول قطمة و انا بتفرج عالناس .كانت من اسخف اللحظات اللي عدت عليا في حياتي .
انا ليه بفتكرها بقى كل شوية ؟ لاني انسانة كئيبة غالبا .

......
و انا في المشروع انهاردة قعدت جنبي ست هي و بنتها كانت بتشتكي من ان جوز بنتها مش بيخليها تزورها مرة في الاسبوع ،الست كانت موجوعة جدا انها مضطرة تشوف بنتها كل فترة و متزورهاش براحتها و قاعدة عمالة تقول لبنتها التانية انها تحس بيها لانه البنت اللي كانت حتة منها و ملازماها على طول بقيت دلوقتي بعيدة عنها و فيه فواصل ما بينها .
اوقات لما ماما بتعيط لما تكتشف ان انا هبقى بعيدة عنها مكنتش بعرف افسر شعورها قوي ،الاكيد ان بقى عندي نص تفسير مش هيكمل الا اما يبقى عندي بنت و اكتشف انها هتبعد عني .

.....
مع الوقت عصبيتي بقيت بتزيد ،مريت بفترة لا بأس بيها من الهدوء ،بس حالياً بقيت بحس اني في بركان من المشاعر ،عصبية بزيادة و عندي فيضان من الدموع بينزل في ثواني ممكن اكون عندي حالة من الاضطراب العاطفي او الهرموني ،او غالبا في مرحلة تغيير معرفش تغيير لايه بس ربنا يستر ميبقاش لحاجات وحشة .
انا بقول كل دة ليه ؟
مش عارفة اهو نوع من انواع التفريغ و خلاص .

صاحي حزين

أنا صاحي إنهارده حزين، وعليا كتابة مكنش ليّا نفس أكتب. مش عارف الواحد من اللي بيشوفه بقى عنده قابلية أكتر للحزن، ولاّ المفروض يبذل مجهود أكتر عشان يبقى سعيد، الخلاصة إنّي صحيت بدري، حلمت بكوابيس، شفت ناس بكرههم في الحلم، وصحيت نفسي ضيق، كأني طلعت عمارة من غير أسانسير. عندي حالة خمول فظيعة، حاسس بورطة إنّي لبست نفسي في مواعيد، كان نفسي فعلاً أرتاح وأستمتع بعدم فعل شيء لمدة. أنا بكون أسهل لاستقبال الحزن وهبة مش موجودة، يلا إحنا مش كبار على الحياة عشان تلهو بينا.

مناخيري بنت الحلال

انهاردة و انا ببص في المراية قعدت اركز في مناخيري الضخمة اللي مبحبهاش و اللي انت متأكد انها حلوة و بنت حلال ،
و انا في المدرسة زمان كنت بقيم جمال البنت من جمال و صغر مناخيرها ،و في تالتة اعدادي اديت نفسي لقب أوحش مناخير في الفصل .
كنت حزينة وقتها لما اكتشفت ان كل بنات الفصل كدة شكلهم حلو و انا اوحشهم .
كانت من ايامي الوحشة اللي بقيت متأكدة اني مش هرجعلها تاني طول ما انت بتقرصني من مناخيري و بتأكدلي انها حلوة و بنت حلال .

في تكذيب الأبراج

الرسول عليه الصلاة والسلام لمّا قال تهادوا تحابوا، كان بيحط خطة للبشرية لو عاوزين ينشروا ما بينهم مشاعر كويسة بدل الوشوش اللي حوالينا في الشوارع. الهدية بتنشر روح بين الناس، حتى لو الهدية دي ميدالية بجنيه، لكن بيكون ليها ذكرى حلوة، إحنا في الأساس بنعيش عشان نكوّن ذكريات.
***
إنهارده وأنا في شارع المعز كنت متضايق إن أغلب المحلات قافلة، هو الحقيقة كنت متضايق أكتر لأن هبة مش معايا، كل شوية تدخلني محل، وفي الآخر منشتريش حاجة، المهم هبة تحس برغبتها القوية في الشرا، وتبدأ تحسس محفظتك، فتلاقيها شدت إيدك، وراح الاهتمام من العيون، سبب ضيقي من قفل المحلات إني كنت عاوز أجيب أي حاجة لهبة كتذكار.
***
مشينا في الزمالك، فوجئنا بديوان قرطاسية، دخلنا، لقيت نوت حلوة قوي، مكتوب عليها إن الطبع غلاب، وتحتها برج العقرب وصفاته.
***
حساس: في الواقع هبة حساسة جداً فعلاً، يمكن مشاعرها أقوى حاجة عندها، لكن في النهاية مش حساسة بأفورة، لو اتقالت جملة تفسرها بشكل تاني، دايماً كان عندي هاجس إني أقعد أحسب الكلام قبل ما أقوله، عشان لو اللي مرتبط بيها حساسة بزيادة وكدا، هبة فاهمه كويس إنّي بحبّها، وإني مش حقول حاجة أقصد أضايقها بيها.
***
غامض: هبة غامضة؟.. ممكن مع كل الناس ماعداي. هبة بالنسبة لي كتاب مفتوح تماماً، هبة عمرها ما عرفت تعمل لي مفاجآة.. حتى هدية عيد ميلادي اللي هي كانت مخدة عليها صورة المينونز، عرفتها بالتفصيل، كل الأماكن اللي بتفكّر نقعد فيها، تلاقيني بقولها لها. بحاول أقنعها إن عندي الحاسة السادسة وجو أحمد الفيشاوي دا، بس الحقيقة إنّ الفكرة تكمن في كونها مش غامضة.
***
متقلب: أينعم دي الصفة اللي أبصم بالعشرة إنّها حقيقية، هبة ممكن تبقى حتتجنن وتاكل سينابون وفجأة تقول لي تعالى نجيب باتون ساليه أحسن. في النهاية التقلّب - طالما مزدش على حده - هو حلو عشان يكسر أي رتابة في الحياة، ويقضي على شبح الملل السخيف.
***
عاطفي: الحب الحب، هبة العاطفة كلها، يمكن عندها مشكلة في إن عواطفها مش بتجيد التعبير عنها، لمّا بقول لها قولي لي كلام حلو، بتسكت، أو بتقوّل: بحبّك يا معلّم، أحياناً أينعم الواحد بيبقى محتاج يسمع كلام أكتر، بس أنا ببقى متأكد إن العاطفة موجودة، وإن الكلام مجرد وسيلة للتعبير، زي ما في العيون، الإيدين، والطبطبة.
***
كتوم للأسرار: امممم.. أبداً.. هبة قبل ما نرتبط حكت لي كل حاجة في حياتها مينفعش تتحكي لزوج المستقبل أو حتى لصديق، يمكن لأن دا كان أهم هواجسها، إن متلاقيش اللي يسمع لها كل حاجة، أي إنسان بيبقى نفسه يتكلّم من غير قيد، إحنا عملنا الثورة ومات مننا الآف عشان نتكلّم، زاد القيد، بس حاولنا، هبة مكنتش عاوزة قيد، مش عاوزة السر يفضل محبوس جواها، يطلّع للبني آدم اللي بيشاركها كل حياتها، ومش لأي حد تاني.
***
كان لازم يكتبوا على النوت، الحب غلاب مش الطبع.

مكتوبة بتاريخ 2-2 من اللاب ومستني أول ديلفري في شقة الشيخ زايد، ومش عارف إن كان حيوصل ولا لأ.
ملحوظة: التدوينة مش براجعها ولا بكتبها في وررد، بتخيّل نفسي بكتبها في نوت.

ليه الليل

دايما الواحد بيفكر ليه الحب احلى بليل. ليه دايما الكلام بيكون أرق ومفيش أي مظهر للحياة وصخبها. يمكن لأن الدوشة والحب متضادان، يمكن لأن الليل سكونه بيرطب الروح، أو يمكن لأن اليوم بيختم على صوت هبة.
بيكون آخر لحظات اليوم بعد ساعات من الدوران المحموم حوالين الحاجات. الواحد بيحلم الليل يطول عشان يسمع رغي هبة أكتر عن كل حاجة. كلامها بيجيب العمر من الأول فعلا. صوتها فيه من سكون الليل وهدوء القمر.
أنا بحب الليل.
٢-٢ بعد مكالمة ليلية وهبة مفكراني نمت بس قلت لازم أدون.
مكتوبة بالموبايل.